2 Corinthians 1

PAULUS wanporon en Iesus Kristus amen pan kupur en Kot o ri atail Timoteus on momodisou en Kot, me mi Korint o saraui kan karos, me mi Akaia.

Mak o popol san ren Kot Sam atail o atail Kaun Iesus Kristus en mi re omail.

Meid iasanai Kot o Sam en atail Kaun Iesus Kristus, o Sam en kalanan, o Kot en kamait pokon,

Me kin kamakamait kit ni at kamekam kan karos, pwe kit en pil kak kamait ir ala, me mi nan son en kamekam akan karos, ki kamait, me kit kamait kila ren Kot.

Pwe duen Kristus a kamekam me muladok on kit, iduen kamait ren Kristus pil itar penan kit.

A ma kit pai olar, nan a kin wiaui, pwen kamait o kamaur komail la, mepukat kin wiaui ni omail kanonama ni kalokolok ota, me kit kin kalokolokki.

O at kaporopor kin komail me teneten, pwe se asa, ma komail ian kamekam, komail pil pan ian kamaitala.

Ri ai ol akan, se sota men, komail en sasa duen at kamekam nan Asien o at patau kaualap, lao solar kaporopor en maur at.

Ari, kit lamedar, me se pan mela. A mepukat wiauier, pwe sen der keleki pein kit, pwe Kot eta, me kin kaiasada me melar akan.

Me kotin dore kit ala san mela wet, o a pil pan dore kit ala; o se kaporoporeki, me a pil pan kotin dore kit ala kokolata.

Komail pil sauasa kit ni omail nidinid, pwe me toto en danke pweki at pai me se aleer.

Pwe iet kapin pat: Insen at kin kadede on kit, me se weweideki karakarak o melel en Kot nin sappa o nan pun omail, kaidin ni lolekon en pali uduk, a ki mak en Kot.

At intin won komail kaidin toror san me komail kin wadok o kamelele. A i kaporoporeki me komail pan kamelele kit kokolata duen akai komail kamelele kit er.

Pwe kit me kapin pa omail, dueta komail me kapin pat ni ran en Kaun Iesus.

A ni kaporopor wet, me i men pwar kilan komail mas o, pwe komail en pur on pereperen.

I ap pan daulul lan komail ni ai pan kolan Masetonien, ap pil puredo re omail san Masetonien, a komail pan kalua ia lan Iudiia.

A iaduen, nai me sapun ni ai kileledier mepukat? De i kin kileledi mepukat ni tiak en pali uduk, pwen ei ei o so so tapi san pein nai?

A Kot me melel, pwe me se indan komail me sota ei o so.

Pwe sapwilim en Kot Iesus Kristus, me kit padaki on komail er, nai, o Silwanus, o Timoteus, I kaidin ei o so, a ei eta re a,

Pwe inau en Kot akan karos me ei eta re a o me amen re a, pwe kit en kaliwanada Kot.

A me kin katinai kit o komail pan Kristus o keie kitail er, iei Kot,

Me pil kotin kileledier kitail o kotiki on kitail er komoan Nen nan monion atail.

A i kin likwir on Kot me saunkadede en nen i, me i saikenta pwara wow komail nan Korint, pwe i de katoutoui komail.

Kit sota men poedi omail poson, a kit men sauasa ta omail peren, pwe komail keleki poson.